資料庫

「點算呀！點算呀！大件事啦！」

神情緊張的Lily箭步走進青鳥的大門，喊着：「點算呀！點算呀！大件事啦！」開門的青鳥同事微笑着回答：「你冷靜啲先，發生咩事啊？」

Lily是中心的常客，與中心同事亦是多年好友，每當Lily有趣事想分享、有煩惱想訴苦，她都會到中心找同事傾訴。

「你睇吓我依度，今次大鑊啦，我以後點見人啊？」Lily指着自己的頭皮哭訴着。「我依個位啲頭髮甩曬啦！你知我最着緊自己啲頭髮㗎啦。」說罷，Lily用力抓住一撮頭髮，在確認該撮頭髮還「健在」時，大力的拉扯令幾根頭髮掉落。「你睇，又甩啦，咁我咪好快禿頭？死啦今次！」「你冷靜啲先，其實睇落去唔算好覺，不如你坐低慢慢講。」同事安慰着，並遞上一杯暖水。

Lily繼續與青鳥的同事聊了一會兒，說道：「唔知我係唔係近排壓力太大，成日都好緊張。我成日掛住望電話，每幾秒就check住有無新生意，連食飯都逼自己五分鐘內食完，驚miss咗任何一單生意，真係人都癲！」「嘩！你咁勤力，咪揾好多囉？」「OK啦，不過都唔夠我啲朋友多。佢哋揾好多㗎，我算少㗎啦。」

同事續問：「咁你揾咁多，有無諗住點用呀？」Lily嘆一嘆氣道：「唉，唔知啊，之前諗過買樓，不過宜家樓價咁貴，無可能㗎喇。平時我又唔係點洗錢，唔知啊⋯⋯」Lily思考了一會兒，繼續說下去：「我發現自己成日都會同人比較，我見到同我年齡差唔多嘅同行揾好多，我就會覺得我都應該要揾得一樣多。」同事回應：「點都會有人揾得多過你㗎喎，一路咁落去咪好辛苦囉？」「都係，我平時都算慳，不過⋯⋯」Lily喃喃自語了一會，同事提議：「你不如定一個目標生意額，達到目標之後賺嘅錢就當Bonus，令自己唔洗無止境咁工作，俾自己唞吓啦。」聊多了一陣子，Lily便要離去。「我一陣間約左睇中醫，希望我啲頭髮有救啦。」

Lily與普通上班族一樣，工作上都會遇到形形色色的壓力。不過Lily面對壓力時，懂得留意自己身體發出的警號，主動找人傾訴，並會誠實面對自己的情感和想法，進而嘗試找出舒解壓力的方法。希望大家都找到適合自己的減壓方法啦！